ട്വന്റി ട്വന്റി കോട്ടയം ജനകീയ കൂട്ടായ്മയുടെ ബൈലോ
നിയമാവലി
അദ്ധ്യായം I - ആമുഖം
കോട്ടയം ജില്ലയിലെ മുഴുവന്‍ ജനങ്ങളുടേയും ക്ഷേമത്തിനും ഭരണസംവിധാനത്തിലെ അഴിമതി, കെടുകാര്യസ്ഥത, സ്വജനപക്ഷപാതം എന്നിവ നിര്‍മ്മാര്‍ജ്ജനം ചെയ്യുന്നതിനും ഭരണരംഗത്ത് സുതാര്യത, അക്കൌണ്ടബിലിറ്റി, ജനകീയ പങ്കാളിത്തം എന്നിവ ഉറപ്പ് വരുത്തുന്നതിനും ജനങ്ങളുടെ അവകാശങ്ങള്‍ സംരക്ഷിക്കുന്നതിനും ജാതി, മത, രാഷ്ട്രീയ ചിന്തകള്‍ക്കതീതമായി എല്ലാ ജനങ്ങളേയും നാടിന്റെ വികസനത്തില്‍ പങ്കാളികളാക്കുന്നതിനും ജനങ്ങളെ ദോഷമായി ബാധിക്കുന്ന പ്രശ്നങ്ങള്‍ക്ക് പരിഹാരം കണ്ടെത്തുന്നതിനും ഗ്രാമസ്വരാജില്‍ അധിഷ്ഠിതമായി ഗ്രാമങ്ങളേയും നഗരങ്ങളേയും സ്വയംപര്യാപ്തമാക്കുന്നതിനും പരിസ്ഥിതി സൗഹാര്‍ദ്ദ സുസ്ഥിര വികസനം നടപ്പിലാക്കുന്നതിനും വേണ്ടി 1955 - ലെ ട്രാവൻകൂർ - കൊച്ചിൻ സാഹിത്യ ശാസ്ത്രീയ ധാർമ്മിക സംഘങ്ങൾ രജിസ്റ്റർ ചെയ്യുന്നതിനുള്ള ആക്റ്റ് അനുസരിച്ച് രൂപീകൃതമായ സംഘടനയാണ് ട്വന്റി ട്വന്റി കോട്ടയം.
1. സംഘടനയുടെ പേര് : ട്വന്റി ട്വന്റി കോട്ടയം
2. മേല്‍വിലാസം : XIII/656, വട്ടത്തൊട്ടിയില്‍ ബില്‍ഡിംഗ്
ടി.ബി. - എം.എല്‍ റോഡ്, കോട്ടയം - 686001
3. രജിസ്റ്റേര്‍ഡ് ഓഫീസ്
ബില്‍ഡിംഗ് നമ്പര്‍ : XIII/656
വാര്‍ഡ്‌ : XIII
കര : ടി.ബി. - എം.എല്‍ റോഡ്
മുനിസിപ്പാലിറ്റി : കോട്ടയം
വില്ലേജ് : കോട്ടയം
താലൂക്ക് : കോട്ടയം
ജില്ല : കോട്ടയം
പോസ്റ്റ്‌ : കോട്ടയം
പിന്‍ : 686001
4. സംഘടനയുടെ പ്രവര്‍ത്തന പരിധി
കോട്ടയം ജില്ല മുഴുവന്‍
അദ്ധ്യായം II - ഉദ്ദേശലക്ഷ്യങ്ങൾ
5. ഉദ്ദേശങ്ങൾ, ലക്ഷ്യങ്ങൾ
1. ഭരണ സുതാര്യത, അഴിമതി നിര്‍മ്മാര്‍ജ്ജനം എന്നിവ ഉറപ്പ് വരുത്തുന്നതിനും പൊതുമുതല്‍ നഷ്ടപ്പെടാതിരിക്കുന്നതിനും ആവശ്യമായ പദ്ധതികള്‍ ആവിഷ്കരിച്ച് നടപ്പിലാക്കുക.
2. കേന്ദ്ര-സംസ്ഥാന സര്‍ക്കാരുകളും തദ്ദേശസ്വയംഭരണ സ്ഥാപനങ്ങളും നല്കുന്ന സേവനങ്ങളും ആവിഷ്കരിക്കുന്ന പദ്ധതികളും യഥാസമയവും യഥാരീതിയിലും പൊതുജനങ്ങള്‍ക്ക് ലഭിക്കുന്നുണ്ടെന്ന് ഉറപ്പു വരുത്തുക. സര്‍ക്കാര്‍ സേവനങ്ങള്‍ ലഭിക്കുന്നതിനാവശ്യമായ സഹായം ജനങ്ങള്‍ക്ക് നല്‍കുക, സേവനങ്ങളെ കുറിച്ച് ജനങ്ങളെ ബോധവാന്മാരാക്കുക.
3. വിവിധ തരത്തിലുള്ള സാമൂഹിക വികസന പ്രോഗ്രാമുകള്‍ / പ്രവര്‍ത്തനങ്ങള്‍ എന്നിവ ആരംഭിക്കുക, സ്ഥാപിക്കുക, പ്രമോട്ട് ചെയ്യുക, നടത്തിക്കൊണ്ട് പോകുക, പരിപാലിക്കുക, സഹായിക്കുകയോ, സാമ്പത്തിക സഹായം നല്‍കുകയോ ചെയ്യുകയും പൊതുജനങ്ങളുടെ ക്ഷേമത്തിലേയ്ക്കായുള്ള കമ്മ്യൂണിറ്റി ഹാളുകള്‍, ധര്‍മ്മാശുപത്രികള്‍, മറ്റ് സ്ഥാപനങ്ങള്‍ എന്നിവ സ്ഥാപിക്കുകയും ചെയ്യുക.
4. ഓരോ പ്രദേശത്തിന്റെയും സമഗ്രമായ വികസനം അവിടെയുള്ള ജനങ്ങളുടെ ഇഷ്ടത്തിനും താല്പര്യത്തിനും അനുകൂലമായി വിന്യസിക്കുവാൻ ആവശ്യമായ പ്രവര്‍ത്തനങ്ങളില്‍ ഏര്‍പ്പെടുക.
5. സംഘടനയിലെ അംഗങ്ങളുമായോ പൊതുജനങ്ങളുമായോ ബന്ധപ്പെട്ട വിഷയങ്ങള്‍ പരിഹരിക്കുന്നതിലേയ്ക്കായി ന്യായവും നീതിയുക്തവുമായ നടപടികള്‍ കൈക്കൊള്ളുക.
6. പൊതുതാല്പര്യം സംരക്ഷിക്കുന്നതിലേയ്ക്കായി യുക്തമെന്ന് തോന്നുന്ന സംഗതികളില്‍ ക്ഷമതയുള്ള അധികാരസ്ഥാനങ്ങളേയോ കോടതിയേയോ സമീപിക്കുക.
7. ജീവകാരുണ്യ പ്രവര്‍ത്തനങ്ങള്‍ നടത്തുക.
8. പരിസ്ഥിതി സംരക്ഷണം, പരിസ്ഥിതി സൗഹാര്‍ദ്ദ വികസനം എന്നിവ ലക്ഷ്യമാക്കി പ്രവര്‍ത്തിക്കുക.
9. സംഘടനയുടെ ഉദ്ദേശലക്ഷ്യങ്ങളുമായി ബന്ധപ്പെട്ട വിഷയങ്ങളില്‍ സാമൂഹ്യ ഇടപെടലുകള്‍ നടത്തുന്ന അംഗങ്ങളേയും അതുപോലെ വിവിധ തുറയില്‍ നിന്നുള്ള മറ്റ് വ്യക്തികളേയും പ്രോത്സാഹിപ്പിക്കുകയും ആദരിക്കുകയും ചെയ്യുക.
10. വിവിധ കേന്ദ്ര-സംസ്ഥാന സര്‍ക്കാര്‍ പദ്ധതികള്‍ ഏറ്റെടുത്തു നടപ്പിലാക്കുക. സർക്കാരിന്റേയും തദ്ദേശസ്വയംഭരണസ്ഥാപനങ്ങളുടേയും മറ്റു സർക്കാർ ഏജൻസികളുടെയും ആഭിമുഖ്യത്തിൽ നടക്കുന്ന വികസന പ്രവർത്തനങ്ങളിൽ സജീവമായി പങ്കെടുക്കുക.
11. സംഘടനയുടെ ഉദ്ദേശ്യ ലക്ഷ്യങ്ങൾ നിറവേറ്റുന്നതിനായി യുക്തവും ന്യായവും നീതീകരിക്കാവുന്നതുമായ എല്ലാ പ്രവർത്തനങ്ങളും നടത്തുക.
12. അംഗങ്ങൾക്ക് പൊതുതാല്പര്യമുള്ള കാര്യങ്ങൾ ചെയ്യുന്നതിലേയ്ക്കായി സമാനചിന്താഗതിക്കാരുടെ കൂട്ടായ്മകൾ സംഘടിപ്പിക്കുക. പൊതുവായ വിഷയങ്ങളില്‍ ആവശ്യമുള്ള പക്ഷം നല്ല രീതിയില്‍ പ്രവര്‍ത്തിക്കുന്ന സമാന സ്വഭാവമുള്ള സംഘടനകളുമായി ചേര്‍ന്ന് പ്രവര്‍ത്തിക്കുക.
13. വിവിധ സര്‍ക്കാര്‍ ഏജന്‍സികള്‍, സന്നദ്ധസംഘടനകള്‍, മാധ്യമ പ്രവര്‍ത്തകര്‍, പൊതുജനങ്ങള്‍ തുടങ്ങിയവരുമായി യോജിച്ചോ ഒറ്റയ്ക്കോ ഏതൊരു തരത്തിലുമുള്ള രക്ഷാദൗത്യങ്ങളിലും ദുരിതാശ്വാസ പ്രവര്‍ത്തനങ്ങളിലും പുനരധിവാസ പ്രവര്‍ത്തനങ്ങളിലും പങ്കാളികളാവുക.
14. കുട്ടികള്‍, സ്ത്രീകള്‍, മുതിര്‍ന്ന പൌരന്മാര്‍ എന്നിവരുടെ ക്ഷേമത്തിനായും അവരുടെ ശാക്തീകരണത്തിനും അവകാശ സംരക്ഷണത്തിനായും പ്രവര്‍ത്തിക്കുക.
15. മനുഷ്യാവകാശങ്ങളും മൌലികാവകാശങ്ങളും സംരക്ഷിക്കുന്നതിനായി നിലകൊള്ളുക.
16. സംഘടനയുടെ ഉദ്ദേശ്യ ലക്ഷ്യങ്ങളുടെ സാക്ഷാത്ക്കാരത്തിനായി അംഗത്വഫീസ്, സംഭാവനകൾ, സഹായധനം മുതലായവ ഉൾപ്പടെ യുക്തവും ന്യായവുമായ മാർഗ്ഗങ്ങളിൽ കൂടി ധനം സമ്പാദിക്കുക.
17. സംഘടനയുടെ ക്ഷേമപ്രവർത്തനങ്ങൾ നടപ്പാക്കുന്നതിന് സർക്കാരിന്റേയും തദ്ദേശസ്വയംഭരണസ്ഥാപനങ്ങളുടേയും മറ്റ് ഏജൻസികളുടേയും സഹായം ലഭ്യമാക്കുക.
18. സംഘടനയുടെ പേരിൽ വസ്തുക്കൾ സമ്പാദിക്കുകയും കെട്ടിടങ്ങൾ നിര്‍മ്മിക്കുകയും അവ സംരക്ഷിച്ച് പൊതുവായ ആവശ്യങ്ങൾക്ക് ഉപയോഗിക്കുകയും ചെയ്യുക.
19. സമൂഹ മാധ്യമങ്ങളിലൂടെ സംഘടനയുടെ ആശയങ്ങളും പ്രവര്‍ത്തനങ്ങളും ജനങ്ങളില്‍ എത്തിക്കുക.
20. വിവിധ സര്‍ക്കാര്‍ വകുപ്പുകളേയും സര്‍ക്കാരേതര വകുപ്പുകളേയും പൊതുമേഖലാ സ്ഥാപനങ്ങളേയും സര്‍ക്കാരിന് കീഴിലോ സര്‍ക്കാരിന്റെ നിയന്ത്രണത്തിലോ ഉള്ള വിവിധ സ്ഥാപനങ്ങളേയും സര്‍ക്കാര്‍ ധനസഹായം ലഭിക്കുന്ന സ്ഥാപനങ്ങളേയും സോഷ്യല്‍ ഓഡിറ്റിംഗിന് വിധേയമാക്കുക.
21. മറ്റു ധാർമ്മിക ക്ഷേമപ്രവർത്തനങ്ങളിലും ഏർപ്പെടുക.
22. പ്രവാസികളുടെ വിവിധ പ്രശ്നങ്ങള്‍ പരിഹരിക്കുന്നതിന് ആവശ്യമായ ഇടപെടലുകള്‍ നടത്തുക.
23. സൈനികരുടെ കുടുംങ്ങള്‍ക്ക് ആവശ്യമായ എല്ലാവിധ സഹായങ്ങളും മുന്‍ഗണനയോടെ ചെയ്ത് കൊടുക്കുക.
24. കലാകായിക, വിദ്യാഭ്യാസ ഉന്നതിക്കായി ഉചിതമായ പദ്ധതികള്‍ ആവിഷ്കരിച്ച് നടപ്പാക്കുക.
25. ഭിന്നശേഷിക്കാര്‍ക്ക് വേണ്ടി അര്‍ഹമായ പരിഗണന നല്കി ക്ഷേമപ്രവര്‍ത്തനങ്ങള്‍ നടത്തുക.
26. സംഘടനയുടെ ഉദ്ദേശലക്ഷ്യങ്ങള്‍ നേടുന്നതിനാവശ്യമായ പദ്ധതികള്‍ ആവിഷ്കരിച്ച് നടപ്പിലാക്കുകയും വ്യവഹാരങ്ങള്‍ ഉള്‍പ്പടെയുള്ള നിയമനടപടികള്‍ സ്വീകരിക്കുകയും ചെയ്യുക.
അദ്ധ്യായം III - നിർവചനങ്ങൾ
6. നിർവചനങ്ങൾ
1. സംഘടന എന്നാൽ ഇതിൽ ഉൾപ്പെട്ടിട്ടുള്ള അംഗങ്ങളുടെ കൂട്ടായ്മ എന്ന് അർത്ഥമാകുന്നു.
2. അംഗം എന്നാൽ സംഘടനയുടെ നിയമങ്ങളും ചട്ടങ്ങളും അനുസരിച്ച് പ്രവേശിക്കപ്പെട്ടിരിക്കേ വരിപ്പണം കൊടുത്തിരിക്കുകയോ അതിലെ അംഗങ്ങളുടെ റോളിലോ ലിസ്റ്റിലോ ഉള്‍പ്പെട്ടിരിക്കുകയോ ചെയ്യുകയും ആ നിയമാവലിയോ ചട്ടങ്ങളോ അനുസരിച്ച് രാജിവെക്കാതിരിക്കുകയും ചെയ്യുന്ന ആൾ എന്ന് അർത്ഥമാകുന്നു.
3. ഭരണസമിതി എന്നതിന് സംഘടനയുടെ ചട്ടങ്ങളും റെഗുലേഷനുകളും മുഖേന ഭരണമേൽപ്പിക്കപ്പെട്ട ഭരണകർത്താക്കൾ, കമ്മിറ്റി, കൌണ്‍സിൽ, ഡയറക്ടർമാർ അഥവാ ഭരണസമിതി എന്ന് അർത്ഥമാകുന്നു.
4. വർഷം എന്നാൽ ഓരോ വർഷവും ഏപ്രിൽ 1 മുതൽ മാർച്ച് 31 വരെയുള്ള കാലം എന്ന് അർത്ഥമാകുന്നു.
5. വോളണ്ടിയര്‍ എന്നാല്‍ സംഘടനയുടെ ഉദ്ദേശലക്ഷ്യങ്ങള്‍ നേടുന്നതിനായി പ്രവര്‍ത്തിക്കുന്ന അംഗം അല്ലാത്ത ഏതൊരാളും
6. വിവരം - വിവരാവകാശ നിയമം 2005-ലെ നിര്‍വചനം
7. സെക്രട്ടറി - സംഘടനയുടെ ജനറല്‍ സെക്രട്ടറി.
8. രാഷ്ട്രീയ പാര്‍ട്ടി എന്നാല്‍ ഇലക്ഷന്‍ കമ്മീഷനില്‍ രജിസ്റ്റര്‍ ചെയ്തിട്ടുള്ള ഏതെങ്കിലും രാഷ്ട്രീയ പാര്‍ട്ടിയോ രാഷ്ട്രീയ പാര്‍ട്ടിയുടെ പോഷക സംഘടനയോ ട്രേഡ് യൂണിയനോ എന്നര്‍ത്ഥമാകുന്നു.
അദ്ധ്യായം IV - അംഗത്വം സംബന്ധിച്ച സാമാന്യ വ്യവസ്ഥകള്‍
7. അംഗത്വം (Membership)
ഭരണസമിതിയുടെ അംഗീകാരത്തോടെ ജാതി-മത-വര്‍ഗ്ഗ-ലിംഗ-രാഷ്ട്രീയ ഭേദമെന്യേ സംഘടനയുടെ പ്രവർത്തനങ്ങളിൽ താല്പര്യമുള്ള, സംഘടനയുടെ നിബന്ധനകൾ അനുസരിച്ച് പ്രവർത്തിക്കാൻ സമ്മതമുള്ള 18 വയസ്സിനുമേൽ പ്രായമുള്ള ഏതൊരാൾക്കും ഈ വകുപ്പിലോ അതിലെ ഉപവകുപ്പുകളിലെ പറയുന്ന നിബന്ധനകള്‍ക്ക് വിധേയമായി അംഗമായി ചേരാവുന്നതോ അംഗത്വം നല്‍കാവുന്നതോ ആണ്.
8. അംഗത്വം സംബന്ധിച്ച നിബന്ധനകള്‍
1. സംഘടന രൂപീകരിച്ച ആദ്യ രണ്ട് വര്‍ഷങ്ങളില്‍ അപേക്ഷിക്കുന്നവര്‍ കുറഞ്ഞത് 6 മാസവും അതിന് ശേഷം അപേക്ഷിക്കുന്നവര്‍ കുറഞ്ഞത് 12 മാസവും വോളണ്ടിയര്‍ ആയി സംഘടനയില്‍ സജീവ പ്രവര്‍ത്തനം നടത്തിയിട്ടുണ്ടായിരിക്കണം.
2. അംഗത്വത്തിന് അപേക്ഷിക്കുന്നവര്‍ നിശ്ചിത ഫോറത്തില്‍ അപേക്ഷയും സത്യപ്രസ്താവനയും സെക്രട്ടറി മുന്‍പാകെ സമര്‍പ്പിക്കേണ്ടതാണ്.
3. ഉന്നത വ്യക്തിത്വമുള്ളവരും പൊതുസമൂഹം ആദരിക്കുന്നവരും ഏതെങ്കിലും മേഖലയില്‍ പ്രാഗല്‍ഭ്യം തെളിയിച്ചവരുമായ ആളുകളെ അംഗമാക്കുന്നതിന് മേല്‍ നിബന്ധനകള്‍ ബാധകമായിരിക്കുന്നതല്ല; ഭരണസമിതിയുടെ മൂന്നില്‍ രണ്ട് അംഗങ്ങളുടെ അംഗീകാരത്തോടെ ഇപ്രകാരം അംഗത്വം നല്‍കാവുന്നതാണ്‌.
4. ഏതെങ്കിലും രാഷ്ട്രീയ പാര്‍ട്ടിയിലോ രാഷ്ട്രീയ പാര്‍ട്ടിയുടെ പോഷക സംഘടനകളിലോ ട്രേഡ് യൂണിയനുകളിലോ ഭാരവാഹി ആയിരിക്കുന്നവര്‍ക്ക് സംഘടനയില്‍ അംഗത്വം നല്‍കുന്നതല്ല; എന്നാല്‍ സംഘടനയുടെ ഉദ്ദേശലക്ഷ്യങ്ങളുമായി പൊരുത്തപ്പെടുന്നതും ഭരണസമിതിയുടെ അംഗീകാരം നല്‍കിയിട്ടുള്ളതുമായ രാഷ്ട്രീയ പാര്‍ട്ടികളുടെ ഭാരവാഹികള്‍ക്ക് ഇത് ബാധകമല്ല.
5. സംഘടനയുടെ നിയമാവലി അനുസരിച്ചുള്ള എല്ലാ നടപടികളും അതാത് സാമ്പത്തികവർഷം മാർച്ച് 31നകം വരിപ്പണമോ, മറ്റിനമോ കുടിശ്ശിക കിടപ്പുള്ള ഏതൊരാൾക്കും പൊതുയോഗത്തിൽ വോട്ടു ചെയ്യുന്നതിനോ അംഗമായി പരിഗണിക്കുന്നതിനോ അർഹത ഉണ്ടായിയിക്കുന്നതല്ല.
6. അപേക്ഷയും വരിസംഖ്യയും നല്കിക്കൊണ്ട് സംഘടനയില്‍ അംഗമാവുക എന്നത് ഏതൊരാളുടെയും മൗലിക അവകാശം അല്ലാത്തതാകുന്നു. അംഗത്വം നല്കുന്നതിനുള്ള അധികാരം ഭരണസമിതിയിൽ നിക്ഷിപ്തമാണ്. ഉചിതമായ കാരണങ്ങള്‍ ഉണ്ടെങ്കില്‍ ഏതൊരാളുടെയും അപേക്ഷ നിരാകരിക്കുവാന്‍ ഭരണസമിതിയ്ക്ക് അധികാരമുണ്ടായിരിക്കും. ഭരണസമിതിയുടെ തീരുമാനം അന്തിമമായിരിക്കും.
7. വരിസംഖ്യ ഒരു വര്‍ഷത്തില്‍ കൂടുതല്‍ മുടക്കം വരുത്തുന്നവരുടെ അംഗത്വം താല്‍ക്കാലികമായി മരവിക്കുന്നതാണ്.
8. വനിതകള്‍, വിദ്യാര്‍ഥികള്‍, ഭിന്നശേഷിക്കാര്‍ എന്നിവര്‍ക്ക് വരിസംഖ്യ ഉണ്ടായിരിക്കുന്നതല്ല.
9. അംഗത്വം ഇല്ലാതാകുമ്പോഴോ അംഗത്വം നീക്കം ചെയ്യുമ്പോഴോ ടി അംഗത്തിന് സംഘടനയില്‍ അടച്ചിട്ടുള്ള യാതൊരു തുകയും മടക്കി കൊടുക്കുന്നതല്ല. അംഗത്തിന് ലഭിക്കുന്ന എല്ലാ അവകാശവും അംഗം അല്ലാതാകുമ്പോള്‍ നഷ്ടപ്പെടുന്നതാണ്.
9. അംഗത്വ രജിസ്റ്റർ
1. അംഗങ്ങളുടെ പേര്, മേൽവിലാസം, തൊഴിൽ, വയസ്സ് , വിദ്യാഭ്യാസ യോഗ്യത, മൊബൈൽ നമ്പർ, വാട്ട്സാപ്പ് നമ്പർ, ഇ-മെയില്‍, ബ്ലോഗ്‌/വെബ്സൈറ്റ്, രക്ത ഗ്രൂപ്പ്, അംഗത്വം ലഭിച്ച തീയതി തുടങ്ങിയ വിശദാംശങ്ങള്‍ രേഖപ്പെടുത്തിയ അംഗത്വ രജിസ്റ്റര്‍ ഉണ്ടായിരിക്കേണ്ടതാണ്.
2. ഭരണസമിതിയുടെ അംഗീകാരം ലഭിച്ച് കഴിഞ്ഞാല് അംഗമായി ചേരുന്നവര്‍ രജിസ്റ്ററില്‍ ഒപ്പ് വെയ്ക്കേണ്ടതാണ്.
3. അംഗത്വത്തില്‍ നിന്നും നീക്കം ചെയ്യുന്നത് സംബന്ധിച്ച വിവരങ്ങള്‍ അംഗത്വ രജിസ്റ്ററില്‍ രേഖപ്പെടുത്തേണ്ടതാണ്. അംഗത്വ രജിസ്റ്റര്‍ കാലോചിതമായ മാറ്റങ്ങളോടെ ശരിയായ വിധത്തില്‍ സൂക്ഷിക്കുന്നതിനുള്ള ഉത്തരവാദിത്വം സെക്രട്ടറിയ്ക്കായിരിക്കും.
10. അംഗത്വം ഇല്ലാതാകല്‍
താഴെ പറയുന്ന കാരണങ്ങളാല്‍ അംഗത്വം നഷ്ടപ്പെടുന്നതാണ്.
1. ഏതൊരംഗത്തിനും അംഗത്വം സ്വമേധയാ രേഖാമൂലം രാജി വെയ്ക്കാവുന്നതാണ്. എന്നാൽ ഭരണസമിതിയുടെ തീരുമാനത്തിനു വിധേയമായി മാത്രമേ അത് നടപ്പിൽ വരികയുള്ളൂ. സംഘടനയ്ക്ക് ഏതെങ്കിലും തരത്തിലുള്ള കുടിശ്ശികകളോ ബാധ്യതകളോ ടി അംഗം വരുത്തിയിട്ടുണ്ടെങ്കിൽ അപ്രകാരമുള്ള അംഗങ്ങളുടെ രാജി അംഗീകരിക്കാതെ, ടി ബാധ്യതകൾ തീർപ്പാക്കുന്നതുവരെ തടഞ്ഞു വെയ്ക്കുന്നതിനും ഭരണസമിതിയ്ക്ക് അധികാരമുണ്ടായിരിക്കുന്നതാണ് .
2. മരണം സംഭവിക്കുകയോ സ്ഥിരബുദ്ധി നഷ്ടപ്പെടുകയോ പാപ്പരാവുകയോ ചെയ്യുക.
3. ഗുരുതരമായ ക്രിമിനല്‍ കേസുകളില്‍ ശിക്ഷിക്കപ്പെടുക.
4. വരിസംഖ്യ രണ്ട് വര്‍ഷം കുടിശ്ശിക വരുത്തുകയാണെങ്കില്‍.
5. ഏതെങ്കിലും രാഷ്ട്രീയ പാര്‍ട്ടിയിലോ പാര്‍ട്ടിയുടെ പോഷക സംഘടനകളിലോ ട്രേഡ് യൂണിയനുകളിലോ ഭാരവാഹി ആകുക. എന്നാല്‍ സംഘടനയുടെ ഉദ്ദേശലക്ഷ്യങ്ങളുമായി പൊരുത്തപ്പെടുന്നതും ഭരണസമിതിയുടെ അംഗീകാരം നല്‍കിയിട്ടുള്ളതുമായ പാര്‍ട്ടിയിലോ പാര്‍ട്ടിയുടെ പോഷക സംഘടനകളിലോ ട്രേഡ് യൂണിയനുകളിലോ ഭാരവാഹി ആകുന്നവര്‍ക്ക് ഇത് ബാധകമല്ല.
വിശദീകരണം: അംഗത്തിനായി അപേക്ഷിക്കുമ്പോള്‍ ഭരണസമിതി അംഗീകരിച്ച ഏതെങ്കിലും രാഷ്ട്രീയ പാര്‍ട്ടിയുടെ ഭാരവാഹി ആയിരിക്കുകയും പിന്നീട് ആ അംഗീകാരം നീക്കം ചെയ്യുകയും ചെയ്‌താല്‍ അത് അംഗത്വം നഷ്ടപ്പെടാനുള്ള കാരണമാകുന്നില്ല.
11. അംഗത്വം നീക്കം ചെയ്യല്‍
1. സംഘടനയുടെ നിബന്ധനകള്‍ക്കും നയത്തിനും വിരുദ്ധമായി പ്രവര്‍ത്തിക്കുക, സംഘടനയുടെ സല്‍പേരിനും യശസ്സിനും വിരുദ്ധമായി പ്രവര്‍ത്തിക്കുക, അംഗങ്ങള്‍ക്കിടയില്‍ ജാതി-മത-രാഷ്ട്രീയ-വിഭാഗീയ ചിന്തകള്‍ വളര്‍ത്തുക, സാമ്പത്തിക ക്രമക്കേട് എന്നിവ ബോധ്യപ്പെട്ടാല്‍ ഈ വകുപ്പിന്റെ ഉപവകുപ്പുകളില്‍ പറയുന്ന നടപടിക്രമങ്ങള്‍ പാലിച്ച് പ്രസ്തുത അംഗത്തിന്റെ അംഗത്വം റദ്ദാക്കാന്‍ ഭരണസമിതിക്ക് അധികാരം ഉണ്ടായിരിക്കും.
2. ടി അംഗത്തിന്റെ അംഗത്വം റദ്ദാക്കാന്‍ മതിയായ കാരണം ഉണ്ടെന്ന് ഭരണസമിതിക്ക് തോന്നുന്ന പക്ഷം ടി അംഗത്തിന് സെക്രട്ടറി രേഖാമൂലം കാരണം കാണിക്കല്‍ നോട്ടീസ് നല്‍കേണ്ടതും പതിനഞ്ച് ദിവസത്തിനകം അംഗം സമാധാനം നല്കാതിരിക്കുകയോ, നല്‍കിയ മറുപടി തൃപ്തികരമല്ലാതിരിക്കുകയോ ചെയ്യുന്ന പക്ഷം ഭരണസമിതിക്ക് അംഗത്വത്തില്‍ നിന്നും നീക്കം ചെയ്യാവുന്നതും ആ വിവരം ടി അംഗത്തെ രേഖാമൂലം അറിയിക്കേണ്ടതുമാണ്.
3. പ്രസ്തുത നടപടിയില്‍ അംഗത്തിന് ആക്ഷേപമുള്ള പക്ഷം, ആയത് സംബന്ധിച്ച് അറിയിപ്പ് ലഭിച്ച് 30 ദിവസത്തിനകം അച്ചടക്കസമിതി മുന്‍പാകെ ഒന്നാം അപ്പീല്‍ സമര്‍പ്പിക്കാന്‍ അവസരമുണ്ടായിരിക്കുന്നതും അപ്പീല്‍വാദിയെ നേരില്‍ കേള്‍ക്കാന്‍ ഒരു അവസരം നല്‍കേണ്ടതും പരമാവധി ഒരു മാസത്തിനകം അച്ചടക്കസമിതി അപ്പീലില്‍ തീരുമാനം എടുക്കേണ്ടതുമാണ്. മതിയായ കാരണം ഉണ്ടെന്ന് സമിതിക്ക് ബോധ്യപ്പെടുന്ന പക്ഷം 30 ദിവസത്തിന് ശേഷം ലഭിക്കുന്ന അപ്പീലും പരിഗണിക്കാവുന്നതാണ്.
4. ഒന്നാം അപ്പീലിലെ തീരുമാനത്തില്‍ അംഗത്തിന് ആക്ഷേപമുള്ള പക്ഷം, അപ്പീല്‍ തീരുമാനം ലഭിച്ച് 90 ദിവസത്തിനകം പൊതുയോഗത്തില്‍ രണ്ടാം അപ്പീല്‍ സമര്‍പ്പിക്കാവുന്നതും ആയത് സംബന്ധിച്ച് പൊതുയോഗ തീരുമാനം അന്തിമമായിരിക്കുന്നതുമാണ്. എന്നാല്‍, പൊതുയോഗ അറിയിപ്പ് അംഗങ്ങളെ അറിയിച്ച് തുടങ്ങിയ ശേഷം ലഭിക്കുന്ന അപ്പീലുകള്‍ അതിന് ശേഷമുള്ള പൊതുയോഗത്തിലോ വിശേഷാല്‍ പൊതുയോഗത്തിലോ മാത്രമേ പരിഗണിക്കാന്‍ പാടുള്ളൂ.
5. സ്ഥാപകാംഗങ്ങളുടെ അംഗത്വം നീക്കം ചെയ്യുന്നതുമായി ബന്ധപ്പെട്ട ഏതൊരു ഭരണസമിതി തീരുമാനത്തിനും കുറഞ്ഞത് നാലില്‍ മൂന്ന് പേരുടെ പിന്തുണ ഉണ്ടായിരിക്കേണ്ടതാണ്.
6. സസ്പെന്‍ഷന്‍
ഏതെങ്കിലും അംഗം സാമ്പത്തിക ക്രമക്കേട് നടത്തി അന്യായമായി സംഘടനയ്ക്ക് നഷ്ടമുണ്ടാക്കിയതായി വ്യക്തമായ തെളിവ് ലഭിക്കുന്ന പക്ഷം ടിയാനെ ചെയര്മാന് അടിയന്തിരമായി സസ്പെന്‍ഡ് ചെയ്യാവുന്നതാണ്.
12. അംഗത്തിന്റെ അവകാശങ്ങള്‍
1. സംഘടനയുടെ പ്രവര്‍ത്തനങ്ങളുടെ ഭാഗമാകുക.
2. പൊതുയോഗത്തില്‍ പങ്കെടുക്കുകയും ആവശ്യമാകുന്ന പക്ഷം വോട്ട് രേഖപ്പെടുത്തുകയും ചെയ്യുക.
3. ഭരണസമിതിയെ തിരഞ്ഞെടുക്കുക; തെരഞ്ഞെടുക്കപ്പെടുന്ന പക്ഷം ഭരണസമിതി അംഗമായി പ്രവര്‍ത്തിക്കുക.
4. സംഘടനയുടെ നിയമാവലി, ചട്ടങ്ങള്‍, വാര്‍ഷിക റിപ്പോര്‍ട്ട്, വാര്‍ഷിക വരവ് ചെലവ് കണക്കുകള്‍ എന്നിവയുടെ പകര്‍പ്പ് ലഭിക്കുന്നതിനും രേഖകള്‍ പരിശോധിക്കുന്നതിനും.
5. സംഘടനയുടെ യശസ്സിനും സല്‍പ്പേരിനും വേണ്ടി പ്രവര്‍ത്തിക്കുക.
13. അംഗങ്ങള്‍ക്കും പൊതുജനങ്ങള്‍ക്കും യോഗങ്ങള്‍ നിരീക്ഷിക്കുന്നതിനുള്ള അവകാശം
ഏതൊരു അംഗത്തിനും പൊതുജനങ്ങള്‍ക്കും സെക്രട്ടറിയുടെ അല്ലെങ്കില്‍ അതാത് യോഗത്തിന്റെ കണ്‍വീനറുടെ മുന്‍‌കൂര്‍ അനുവാദത്തോടെ ഭരണസമിതി യോഗങ്ങളോ പൊതുയോഗമോ ഉപകമ്മിറ്റി യോഗങ്ങളോ നിരീക്ഷിക്കാനുള്ള അവകാശം. അതേ സമയം, ഏതെങ്കിലും ഒരു അംഗത്തിനെതിരായ പരാതികളോ ആക്ഷേപങ്ങളോ അച്ചടക്കസമിതിയുമായി ബന്ധപ്പെട്ടതോ ഏതെങ്കിലും വ്യവഹാരങ്ങളുമായി ബന്ധപ്പെട്ടതോ രഹസ്യമായോ പരസ്പര വിശ്വാസത്തിന്റെ അടിസ്ഥാനത്തില്‍ ലഭിച്ച ഒരു വിവരം സംബന്ധിച്ചോ നടക്കുന്ന യോഗത്തില്‍ പുറമേ നിന്നുള്ള അംഗങ്ങളെ ഭാഗികമായോ പൂര്‍ണമായോ സെക്രട്ടറിക്ക് അല്ലെങ്കില്‍ അതാത് യോഗത്തിന്റെ കണ്‍വീനര്‍ക്ക് വിലക്കാവുന്നതാണ്.
അദ്ധ്യായം - V ഭരണ സംവിധാനം
14. പൊതുവായ കാര്യങ്ങള്‍
1. സംഘടനയുടെ ഭരണനിർവ്വഹണത്തിനായി വാര്‍ഷിക പൊതുയോഗം വിളിച്ച് ചേര്‍ത്ത് അതില്‍ നിന്നും താഴെ പറയുന്ന വ്യവസ്ഥകൾ അനുസരിച്ച് 9 അംഗങ്ങളില്‍ കുറയാത്ത ഭരണസമിതി (എക്സിക്യുട്ടീവ്‌ കമ്മിറ്റി) അംഗങ്ങളെയും 2 ഓഡിറ്റർമാരെയും തിരഞ്ഞെടുക്കേണ്ടതാണ്.
2. ഭരണസമിതിയില്‍ താഴേപ്പറയുന്ന ഔദ്യോഗിക ഭാരവാഹികള്‍ ഉണ്ടായിരിക്കേണ്ടതും അവരെ പൊതുയോഗത്തിലെ വോട്ടവകാശമുള്ള അംഗങ്ങള്‍ നേരിട്ട് തിരഞ്ഞെടുക്കേണ്ടതുമാണ്.
ചെയര്മാന് - 1
വൈസ് ചെയര്മാന് -1
സെക്രട്ടറി - 1
ജോയിന്റ് സെക്രട്ടറി - 1
ഖജാൻജി - 1
3. ഭരണസമിതി അംഗങ്ങളില്‍ 50% പേരെങ്കിലും അമ്പത് വയസില്‍ താഴെയുള്ളവര്‍ ആയിരിക്കണം.
4. ഭരണസമിതി അംഗമായി തിരഞ്ഞെടുക്കപ്പെടുന്നവര്‍ അധികാരമേറ്റ് 90 ദിവസങ്ങള്‍ക്കകം തങ്ങളുടെ ആസ്തിവകകളെ സംബന്ധിച്ചും ക്രിമിനല്‍ കേസുകള്‍ സംബന്ധിച്ചും നിര്‍ദ്ദിഷ്ട മാതൃകയിലുള്ള ഒരു സത്യവാങ്മൂലം സെക്രട്ടറിക്ക് നല്‍കേണ്ടതും ആയത് ലഭിച്ച് 15 ദിവസങ്ങള്‍ക്കകം ടി സത്യവാങ്മൂലം സെക്രട്ടറി സംഘടനയുടെ വെബ്സൈറ്റില് പരസ്യപ്പെടുത്തേണ്ടതുമാണ്.
5. ഭരണസമിതിയുടെ കാലാവധി ഒരു വർഷമായിരിക്കും.
6. കാലാവധി പൂര്‍ത്തിയായാലും തിരഞ്ഞെടുപ്പ് കഴിഞ്ഞ് പുതിയ ഭരണസമിതി ചുമതല ഏല്‍ക്കുന്നത് വരെ നിലവിലുള്ള ഭരണസമിതി അധികാരത്തില് തുടരുന്നതാണ്. എന്നാല്‍, ഇത്തരത്തില്‍ കാലാവധി നീട്ടപ്പെട്ട ഭരണസമിതിയ്ക്ക് സംഘം സംബന്ധിച്ച് നയപരമായ തീരുമാനം എടുക്കുന്നതിനുള്ള അധികാരം ഉണ്ടായിരിക്കുന്നതല്ല.
15. ഭരണസമിതി യോഗങ്ങള്‍
1. ആവശ്യമുള്ളപ്പോഴൊക്കെ ഭരണസമിതി യോഗങ്ങള്‍ നേരിലോ ഓണ്‍ലൈനിലോ ചേരാവുന്നതാണ്. എന്നാല്‍, മാസത്തിലൊരിക്കലെങ്കിലും ഭരണ സമിതിയുടെ യോഗം ചേരേണ്ടതാണ്. അടിയന്തിര യോഗങ്ങൾ ഒരു ദിവസത്തെ നോട്ടീസ് നൽകി നടത്താവുന്നതാണ്.
2. യോഗത്തിന്റെ ക്വാറം കമ്മിറ്റി അംഗസംഖ്യയുടെ 2 / 3 ആയിരിക്കേണ്ടതാണ്. ഏതെങ്കിലും കാര്യത്തിൽ തീരുമാനം എടുക്കാൻ തുല്യ അഭിപ്രായം ഉണ്ടായാൽ ചെയര്മാന് കാസ്റ്റിംഗ് വോട്ട് വിനിയോഗിക്കാവുന്നതാണ്.
3. ചെയര്‍മാനോ, വൈസ് ചെയര്‍മാനോ ഇരുവരുടേയും അഭാവത്തില്‍ ഭരണ സമിതി നിശ്ചയിക്കുന്ന മറ്റൊരു ഭരണസമിതി അംഗമോ യോഗത്തില്‍ അധ്യക്ഷം വഹിക്കേണ്ടതാണ്.
4. തക്കതായ കാരണം കാണിക്കാതെ തുടര്‍ച്ചയായി മൂന്നു കമ്മിറ്റി യോഗങ്ങളിൽ ഹാജരകാത്തവരുടെ ഭരണസമിതി അംഗത്വം നഷ്ടപ്പെടുന്നതാണ്.
5. ഭാരവാഹികൾ ഒഴികെ മറ്റേതെങ്കിലും കമ്മിറ്റി അംഗത്തിന്റെ ഒഴിവിലേയ്ക്ക് പകരം ഒരാളെ നോമിനേറ്റ് ചെയ്യാൻ കമ്മിറ്റിയ്ക്ക് അധികാരമുണ്ടായിരിക്കും.
6. ഭാരവാഹികളുടെ സ്ഥാനത്ത് ഒഴിവുവന്നാൽ ആ സ്ഥാനത്തേയ്ക്ക് ഭരണസമിതിയില്‍ നിന്നും ഒരാളെ തിരഞ്ഞെടുക്കാവുന്നതാണ് .
16. ഭരണസമിതിയുടെ അധികാരങ്ങളും ചുമതലകളും.
1. സംഘടനയുടെ ഉദ്ദേശലക്ഷ്യങ്ങള്‍ നേടിയെടുക്കുന്നതിനാവശ്യമായ കര്‍മ്മപരിപാടികള്‍ ആസൂത്രണം ചെയ്ത് നടപ്പാക്കുക.
2. സംഘടനയുടെ നയപരിപാടികള്‍ ആവിഷ്കരിച്ച് പൊതുയോഗത്തില്‍ സമര്‍പ്പിക്കുകയും പൊതുയോഗം അംഗീകരിക്കുന്ന നയപരിപാടികളും പദ്ധതികളും നടപ്പിലാക്കുകയും ചെയ്യുക.
3. അംഗങ്ങളെ ചേർക്കുക. സംഘടനയുടെ താല്പര്യങ്ങൾക്ക് വിരുദ്ധമായി പ്രവര്‍ത്തിക്കുന്ന അംഗങ്ങൾക്കെതിരെ അച്ചടക്ക നടപടികൾ എടുക്കുക.
4. വരവ് - ചെലവു കണക്കുകൾ, സംഘടനയുടെ ആസ്തി ബാദ്ധ്യത എന്നിവ കാണിക്കുന്ന കണക്കുകൾ എഴുതിയോ ഡിജിറ്റല്‍ രൂപത്തിലോ സൂക്ഷിക്കുക.
5. വാർഷിക പൊതുയോഗത്തിലും പ്രത്യേക പൊതുയോഗങ്ങളിലും അവതരിപ്പിക്കേണ്ട രേഖകളേക്കുറിച്ചും, അജണ്ടയെക്കുറിച്ചും ചർച്ച ചെയ്തു തീരുമാനിക്കുക.
6. സംഘടനയുടെ പ്രവർത്തനങ്ങൾക്ക് ആവശ്യമായ ഉദ്യോഗസ്ഥരെ , സേവന വേതന വ്യവസ്ഥകള്‍ നിര്‍ണ്ണയിക്കുക, അച്ചടക്ക നപടികള്‍ സ്വീകരിക്കുക, പിരിച്ച് വിടുക എന്നീ കര്‍ത്തവ്യങ്ങള്‍ സംഘടനയുടെ ചട്ടങ്ങള്‍ക്കും പൊതുയോഗ തീരുമാനങ്ങള്‍ക്കും അനുസൃതമായി ചെയ്യുക.
7. സംഘടനയുടെ ഉദ്ദേശ ലക്ഷ്യങ്ങള്‍ നേടുന്നതിനായി മെമ്പര്‍മാരേയും അല്ലാത്തവരേയും ചേര്‍ത്ത് ഉപസമിതികള്‍ രൂപീകരിക്കുക.
8. ഓരോ വര്‍ഷത്തിലും ഒരിക്കല്‍, സംഘടനയുടെ ചട്ടങ്ങള്‍ അനുസരിച്ച്, സംഘടനയുടെ വാർഷിക പൊതുയോഗം നടത്തുന്ന ദിവസത്തെ തുടര്‍ന്ന് 14 ദിവത്തിനകം അപ്പോള്‍ സംഘടനയുടെ ഭരണം ഏല്‍പ്പിച്ചിട്ടുള്ള ഭരണസമിതി അംഗങ്ങളുടെ ഒരു ലിസ്റ്റ് ജില്ലാ രജിസ്ട്രാർക്ക് അയച്ച് കൊടുക്കേണ്ടതാണ്. കൂടാതെ വാർഷിക പൊതുയോഗത്തിൽ അവതരിപ്പിച്ചു പാസ്സായ ബാക്കിപത്രത്തിന്റെ ഒരു പകർപ്പ് ചെയര്‍മാനും സെക്രട്ടറിയും, ഖജാൻജിയും ചേർന്ന് സാക്ഷ്യപ്പെടുത്തി ഇതോടൊപ്പം അയച്ചു കൊടുക്കേണ്ടതാണ്.
9. സംഘടനയുടെ സാമ്പത്തിക അച്ചടക്കം ഭരണസമിതിയിൽ നിക്ഷിപ്തമാണ്. ഒരു കാരണവശാലും സംഘടനയുടെ ധനം ദുർവിനിയോഗം ചെയ്യാൻ പാടുള്ളതല്ല.
10. സംഘടനയുടെ സുഗമമായ പ്രവര്‍ത്തനത്തിന് ആവശ്യമായ ചട്ടങ്ങള്‍ (ഉപനിയമങ്ങൾ) രൂപീകരിക്കുക.
17. ഭരണസമിതി തിരഞ്ഞെടുപ്പ്
എല്ലാ വര്‍ഷവും മേയ് 15 - ന് മുന്‍പായി വാര്‍ഷിക പൊതുയോഗം വിളിച്ച് ചേര്‍ത്ത് ഭരണസമിതിയെ തിരഞ്ഞെടുക്കേണ്ടതാണ്.
1. ഭരണസമിതിയെ കഴിവതും സമവായത്തിലൂടെ തെരഞ്ഞെടുക്കേണ്ടതാണ്. ആയത് സാധ്യമാകാത്തപക്ഷം തിരഞ്ഞെടുപ്പിലൂടെ ഭരണസമിതിയെ തെരഞ്ഞെടുക്കാവുന്നതാണ്.
2. സംഘടന ആദ്യം രജിസ്റ്റര്‍ ചെയ്ത വര്‍ഷം മുതലുള്ള ഓരോ രണ്ട് വര്‍ഷവും ഓരോ ബ്ലോക്കായി കണക്കാക്കി അതിലാദ്യ വര്‍ഷത്തെ ഭരണസമിതിയെ തന്നെ അടുത്ത വര്‍ഷം കൂടി തിരഞ്ഞെടുക്കേണ്ടതാണ്.
3. തെരഞ്ഞെടുപ്പ് നടത്തേണ്ട സന്ദര്‍ഭങ്ങളില്‍ നിലവിലുള്ള ഭരണസമിതി അതിനാവശ്യമായ ക്രമീകരണങ്ങള്‍ നടത്തേണ്ടതാണ്.
4. ടി സന്ദര്‍ഭങ്ങളില്‍ ഭരണസമിതിയില്‍ ഉള്‍പ്പെടാത്ത പൊതുയോഗം നിര്‍ദ്ദേശിക്കുന്ന ഒരു ഭരണാധികാരിയുടെ നേതൃത്വത്തിലായിരിക്കണം തിരഞ്ഞെടുപ്പ് നടപടികള്‍ നടത്തേണ്ടത്.
5. മൂന്ന് മാസത്തില്‍ കവിയുന്ന കാലത്തെ വരിസഖ്യ കുടിശ്ശികയായിരിക്കുന്ന യാതൊരാള്‍ക്കും വോട്ടവകാശം ഉണ്ടായിരിക്കുന്നതല്ല. തെരഞ്ഞെടുപ്പിന് 30 ദിവസം മുന്‍പ് വരെ അംഗങ്ങള്‍ക്ക് കുടിശ്ശിക അടച്ച് അംഗത്വം ക്രമീകരിക്കുന്നത്തിനുള്ള അവസരം നല്‍കേണ്ടതും 20 ദിവസം മുന്‍പ് വോട്ടേഴ്സ് ലിസ്റ്റിന്റെ കരട് പ്രസിദ്ധീകരിക്കേണ്ടതും പരാതികള്‍ കേട്ടശേഷം തിരഞ്ഞെടുപ്പ് നടത്താനുദ്ദേശിക്കുന്ന തീയതിയ്ക്ക് 15 ദിവസത്തിന് മുന്‍പ് അന്തിമ വോട്ടേഴ്സ് ലിസ്റ്റ് പ്രസിദ്ധീകരിക്കേണ്ടതുമാണ്.
6. തെരഞ്ഞെടുപ്പ് സംബന്ധിച്ച് ഭരണസമിതി തയ്യാറാക്കിയ ചട്ടങ്ങള്‍ സംഘടനയുടെ പൊതുയോഗം അംഗീകരിക്കേണ്ടതുണ്ട്.
18. ഭരണസമിതി അംഗങ്ങളുടെ രാജി
1. ഭരണസമിതി അംഗങ്ങളില്‍ ചെയര്മാന് വൈസ് ചെയര്‍മാനും മറ്റ് അംഗങ്ങള്‍ ചെയര്‍മാനും രാജി സമര്‍പ്പിക്കേണ്ടതാണ്.
2. ചെയര്മാന്, വൈസ് ചെയര്മാന്, സെക്രട്ടറി, ഖജാന്‍ജി എന്നീ ഔദ്യോഗിക ഭാരവാഹികളുടെ രാജി അവര്‍ക്ക് സംഘടനയില്‍ യാതൊരുവിധ ബാധ്യതകളും ഇല്ലാതിരുന്നാല്‍ മാത്രമേ നിലവില്‍ വരുകയുള്ളൂ
3. ഔദ്യോഗിക ഭാരവാഹികളുടെ രാജി നിലവില്‍ വന്നാല് തൊട്ടടുത്ത് കൂടുന്ന പൊതുയോഗം വരെ ഭരണസമിതി നിശ്ചയിക്കുന്ന ഒരംഗം ടി അംഗത്തിന്റെ ചുമതല വഹിക്കേണ്ടതും പൊതുയോഗം രാജി ഒഴിവിലേക്ക് പുതിയ അംഗത്തെ നിശ്ചയിക്കേണ്ടതുമാണ്. അത്തരത്തില്‍ നിശ്ചയിക്കപ്പെടുന്ന ഭരണസമിതി അംഗത്തിന്റെ കാലാവധി തൊട്ടടുത്ത വാര്‍ഷിക പൊതുയോഗം വരെ മാത്രമായിരിക്കും.
4. ഏതെങ്കിലും കാരണവശാല്‍ ഭരണസമിതിയിലെ ഭൂരിപക്ഷം അംഗങ്ങളും രാജി വെച്ചാല്‍ സെക്രട്ടറി ഒരു വിശേഷാല്‍ പൊതുയോഗം വിളിച്ച് കൂട്ടി പുതിയ ഭരണസമിതിയെ തിരഞ്ഞെടുക്കുന്നതിനുള്ള നടപടികള്‍ സ്വീകരിക്കേണ്ടതാണ്.
19. വിവരാവകാശ നിയമം
1. പൊതുജനങ്ങളില്‍ ധനസഹായം സ്വീകരിച്ച് പ്രവര്‍ത്തിക്കുന്ന സംഘടനകളും അഴിമതിക്കെതിരെ പ്രവര്‍ത്തിക്കുന്ന സംഘടനകളും ജനങ്ങളോട് ഉത്തരവാദപ്പെട്ടവരും പ്രവര്‍ത്തനങ്ങളില്‍ സുതാര്യത പാലിക്കേണ്ടവരും ആണ് എന്നതാണ് ഈ സംഘടനയുടെ നിലപാട്. ആകയാല്‍, സംഘടനയുമായി ബന്ധപ്പെട്ട വിവരങ്ങള്‍ പൊതുജനങ്ങള്‍ക്ക് നല്‍കുന്നതിനായി വിവരാവകാശ നിയമം സ്വമേധയാ സംഘടനയ്ക്ക് ബാധകമാക്കുകയാണ്.
2. സര്‍ക്കാരില്‍ നിന്നും ഗണ്യമായ ധനസഹായം ലഭിക്കുമ്പോള്‍ മാത്രമേ സംഘടന നിയമാനുസൃതമായ പൊതുഅധികാരകേന്ദ്രമാവുകയുള്ളൂ. ആകയാല്‍, അതുവരേയും സംഘടനയ്ക്ക് ലഭിക്കുന്ന വിവരാവകാശ അപേക്ഷയിലാവശ്യപ്പെട്ട വിവരം മറ്റേതെങ്കിലും ഒരു പൊതുഅധികാരകേന്ദ്രവുമായി ബന്ധപ്പെട്ടതാണെങ്കില്‍ ആയത് വിവരാവകാശ നിയമം സെക്ഷന്‍ 6(3) പ്രകാരം കൈമാറേണ്ടതില്ല.
3. കേന്ദ്ര സര്‍ക്കാര്‍ 2005-ല്‍ പാസ്സാക്കിയ വിവരാവകാശ നിയമവും ആയത് സംബന്ധിച്ച് കാലാകാലങ്ങളില്‍ സര്‍ക്കാര്‍ ഇറക്കുന്ന ഭേദഗതികളും ഉത്തരവുകളും സെക്ഷന്‍ 6(3) , 20 എന്നിവ ഒഴികെ സംഘടനയ്ക്കും ബാധകമായിരിക്കുന്നതാണ്. ആയത് പ്രകാരം പബ്ലിക് ഇന്‍ഫര്‍മേഷന്‍ ഓഫീസര്‍മാരേയും അപ്പല്ലേറ്റ് അതോറിറ്റിയേയും സംഘടന നിലവില്‍ വന്ന് 120 ദിവസങ്ങള്‍ക്കകം നാമനിര്‍ദ്ദേശം ചെയ്യേണ്ടതാണ്. രണ്ടാം അപ്പീല്‍ അധികാരി സംസ്ഥാന വിവരാവകാശ കമ്മീഷന്‍ ആയിരിക്കും.
4. സംഘടനയ്ക്ക് വിവരാവകാശ അപേക്ഷ നല്‍കുമ്പോള്‍ ലഭിക്കേണ്ട നിയമാനുസൃതമായ അപേക്ഷാ ഫീസ്‌ അപേക്ഷകനില്‍ നിന്നും ഈടാക്കേണ്ടതുണ്ടോ എന്ന് തീരുമാനിക്കാന്‍ ഭരണസമിതിക്ക് അധികാരമുണ്ടായിരിക്കുന്നതാണ്. രേഖാമൂലമോ ഇ-മെയിലായോ ഓണ്‍ലൈനിലോ ലഭിക്കുന്ന ഏതൊരു അപേക്ഷയും സ്വീകരിച്ച് വിവരാവകാശ നിയമത്തിലെ വ്യവസ്ഥകള്‍ക്ക് വിധേയമായി സംഘടനയുമായി മാത്രം ബന്ധപ്പെട്ട വിവരം നല്‍കേണ്ടതാണ്. ഡിജിറ്റല്‍ രൂപത്തില്‍ ലഭ്യമല്ലാത്ത വിവരങ്ങള്‍ക്കും ഹാര്‍ഡ് കോപ്പിയായി നല്‍കേണ്ട വിവരങ്ങള്‍ക്കും പകര്‍പ്പിനുള്ള ഫീസ്‌ നിയമാനുസൃതമായി ഈടാക്കാവുന്നതാണ്.
അധ്യായം VI - ഔദ്യോഗിക ഭാരവാഹികളുടെ അധികാരങ്ങളും ചുമതലകളും
20. ചെയര്മാന്
സംഘടനയുടെ എല്ലാവിധ പ്രവർത്തനങ്ങൾക്കും നേതൃത്വം നൽകുക. കമ്മിറ്റികളിലും പൊതുയോഗങ്ങളിലും അദ്ധ്യക്ഷത വഹിക്കുക. സംഘടനയുടെ ദൈനം ദിന കാര്യങ്ങളിൽ ശ്രദ്ധിക്കുക. ചെയര്മാന് എതിരെ വരുന്ന അവിശ്വാസ പ്രമേയം ചർച്ച ചെയ്യുന്ന യോഗങ്ങളിൽ അദ്ധ്യക്ഷം വഹിക്കാവുന്നതല്ല.
21. വൈസ് ചെയര്മാന്
സംഘടനയുടെ പ്രവർത്തനങ്ങളിൽ ചെയര്‍മാനെ സഹായിക്കുക. ചെയര്‍മാന്റെ അഭാവത്തിൽ കമ്മിറ്റിയുടെ നിർദ്ദേശാനുസരണം അദ്ദേഹത്തിന്റെ ചുമതലകൾ നിർവ്വഹിക്കുക.
22. സെക്രട്ടറി
സംഘടനയുടെ എല്ലാ റെക്കോർഡുകളും സൂക്ഷിക്കുക. കത്തിടപാടുകൾ നടത്തുക. ചെയര്‍മാനുമായി ആലോചിച്ച് ഭരണ സമിതി യോഗങ്ങളും, ഭരണ സമിതി തീരുമാനമനുസരിച്ച് പൊതുയോഗങ്ങളും നടത്തുക. ഭരണ സമിതി യോഗങ്ങളുടേയും പൊതുയോഗങ്ങളുടേയും മിനിറ്റ്സ് എഴുതി അദ്ധ്യക്ഷനെക്കൊണ്ട് ഒപ്പ് വെപ്പിക്കുക. അവയിലെടുത്ത തീരുമാനമനുസരിച്ച് സംഘടനയുടെ പ്രവർത്തനങ്ങൾക്ക് ആവശ്യമായ ചിലവുകൾക്ക്‌ വൌച്ചർ പ്രകാരം ഖജാൻജിയിൽ നിന്നും പണം വാങ്ങുക. ഖജാൻജി എഴുതി തയ്യാറാക്കുന്ന കണക്കുകൾ പരിശോധിച്ച് ഒപ്പ് വയ്ക്കുക. അവ യഥാസമയം ഓഡിറ്റ് ചെയ്യിക്കുക.
23. ജോയിന്റ് സെക്രട്ടറി
സെക്രട്ടറിയെ സഹായിക്കുക. സെക്രട്ടറിയുടെ അഭാവത്തിൽ കമ്മിറ്റിയുടെ നിർദ്ദേശാനുസരണം അദ്ദേഹത്തിന്റെ ചുമതലകൾ നിർവ്വഹിക്കുക.
24. ഖജാന്‍ജി
രസീത് പ്രകാരം വരവുകൾ സ്വീകരിക്കുക. സാമ്പത്തിക രേഖകൾ സൂക്ഷിക്കുക. സാമ്പത്തിക ഇടപാടുകളുടെ ചുമതല വഹിക്കുക. കണക്കുകൾ എഴുതി സെക്രട്ടറിയെക്കൊണ്ട് ഒപ്പ് വെപ്പിക്കുക. വൌച്ചർ പ്രകാരം സംഘടനയ്ക്കു വേണ്ടി ചെലവാക്കുവാൻ പണം നൽകുക. അത്യാവശ്യ ചെലവുകൾക്ക് 5000 രൂപ വരെ ഖജാൻജിയ്ക്ക് കൈയിൽ വെയ്ക്കാവുന്നതാണ്. കൂടുതൽ വരുന്ന തുക കമ്മിറ്റി നിശ്ചയിക്കുന്ന ബാങ്ക് അക്കൗണ്ടുകളിൽ നിക്ഷേപിക്കേണ്ടതാണ്. ഖജാൻജിയുടെ അഭാവത്തിൽ കമ്മിറ്റി അംഗങ്ങളിൽ ഒരാൾക്ക് കമ്മിറ്റി തീരുമാനം അനുസരിച്ച് അദ്ദേഹത്തിന്റെ ചുമതലകൾ നിർവഹിക്കവുന്നതാണ്. ഖജാൻജി ചെലവാക്കുന്ന തുകയ്ക്ക് ഭരണസമിതിയുടെ അംഗീകാരം നേടിയിരിക്കേണ്ടതാണ്.
25. ഉപ സമിതികള്‍
സംഘടനയുടെ ഉദ്ദേശലക്ഷ്യങ്ങള്‍ നേടുന്നതിനായി പ്രാദേശിക തലങ്ങളില്‍ മെമ്പര്‍മാരേയും വോളണ്ടിയര്‍മാരേയും ചേര്‍ത്ത് ഉപസമിതികള്‍ ഭരണസമിതിയ്ക്ക് രൂപീകരിക്കാവുന്നതാണ്. കൂടാതെ, വിവിധ ആവശ്യങ്ങള്‍ക്കോ പദ്ധതികള്‍ നടപ്പാക്കുന്നതിനായും ടി ഉപസമിതികള്‍ രൂപീകരിക്കാവുന്നതാണ്. ഉപസമിതികളുമായി ബന്ധപ്പെട്ട ചട്ടങ്ങള്‍ രൂപീകരിക്കാനുള്ള അവകാശം ഭരണസമിതിയില്‍ നിക്ഷിപ്തമാണ്.
അധ്യായം VII- പൊതുയോഗം സംബന്ധിച്ച വ്യവസ്ഥകള്‍
26. പൊതുവായ കാര്യങ്ങള്‍
സംഘടനയിലെ സാധുതയുള്ള എല്ലാ അംഗങ്ങളും ചേരുന്ന യോഗമാണ് പൊതുയോഗം. മൂന്ന് മാസത്തില്‍ കൂടുതല്‍ മാസവരി കുടിശ്ശികയുള്ള അംഗങ്ങൾക്ക് പൊതുയോഗത്തില്‍ വോട്ടവകാശം ഉണ്ടായിരിക്കുന്നതല്ല. പൊതുയോഗം ആണ്ടില്‍ ഒരു തവണ എങ്കിലും കൂടിയിരിക്കേണ്ടതാണ്. കുടുംബാംഗങ്ങൾക്കായി കുടുംബയോഗങ്ങൾ ചേരാവുന്നതാണ്. സാധാരണ പൊതുയോഗങ്ങൾക്ക് 15 ദിവസത്തെ നോട്ടീസ് നല്‍കിയിരിക്കേണ്ടതാണ്. നോട്ടീസിൽ പൊതുയോഗത്തിന്റെ അജണ്ട, സ്ഥലം, തീയതി, സമയം മുതലായവ കാണിച്ചിരിക്കേണ്ടതാണ്.
നിയമാവലി ഭേദഗതിയ്ക്കായുള്ള പൊതുയോഗം ഒഴികെയുള്ള പൊതുയോഗങ്ങളുടെ ക്വാറം അംഗസംഖ്യയുടെ 1 / 3 ആയിരിക്കും. ക്വാറം തികയാഞ്ഞാൽ അക്കാര്യം കാണിച്ച് 15 ദിവസത്തിനുള്ളിൽ വീണ്ടും യോഗം വിളിച്ചു കൂട്ടേണ്ടതും ആ യോഗത്തിൽ ക്വാറം ബാധകമല്ലാത്തതുമായിരിക്കും.
പകുതിയിൽ കുറയാത്ത അംഗങ്ങൾ കാരണം കാണിച്ച് രേഖാമൂലം ആവശ്യപ്പെട്ടാൽ 30 ദിവസത്തിനകം പൊതുയോഗം വിളിച്ചു കൂട്ടേണ്ടതാണ്. സെക്രട്ടറി അപ്രകാരം ചെയ്യാതിരുന്നാൽ ആവശ്യപ്പെട്ടവർക്ക് തന്നെ പൊതുയോഗം വിളിച്ചു കൂട്ടാവുന്നതും ആ യോഗത്തിൽ (ആകെ അംഗങ്ങളിൽ പകുതിയിൽ കൂടുതൽ അംഗങ്ങൾ പങ്കെടുത്താൽ അത് മതിയായ ക്വാറമായി കണക്കാക്കാവുന്നതാണ്) വച്ച് മേൽപടി വിഷയത്തിലെടുത്ത തീരുമാനം സാധുവായിരിക്കുന്നതുമാണ്. അവിശ്വാസപ്രമേയം അവതരിപ്പിക്കുന്നതിനും ഇത് തന്നെയായിരിക്കും നടപടിക്രമം. അടിയന്തിര ഘട്ടങ്ങളില്‍ 3 ദിവസത്തെ നോട്ടീസ് നല്കി വിശേഷാല്‍ പൊതുയോഗങ്ങൾ വിളിച്ച് കൂട്ടാവുന്നതാണ്.
27. വാര്‍ഷിക പൊതുയോഗം
സംഘടനയുടെ വാര്‍ഷിക പൊതുയോഗങ്ങൾ എല്ലാ വർഷവും മേയ് 15 - ന് മുന്‍പായി വിളിച്ച് കൂട്ടേണ്ടത് ഭരണസമിതിയുടെ ചുമതലയാണ്. ഏതെങ്കിലും കാരണവശാൽ അപ്രകാരം യോഗം കൂടാൻ പറ്റിയില്ലെങ്കിൽ ഏറ്റവും അടുത്ത അവസരത്തിൽ യോഗം കൂടേണ്ടതാണ്. യാതൊരു കാരണവശാലും രണ്ടു വാർഷിക പൊതുയോഗങ്ങൾ തമ്മിലുള്ള ദൈർഘ്യം 15 മാസം കവിയാൻ പാടില്ല. സംഘടനയുടെ വോട്ടേഴ്സ് ലിസ്റ്റില്‍ പേരുള്ള എല്ലാവര്‍ക്കും വാര്‍ഷിക പൊതുയോഗത്തില്‍ പങ്കെടുക്കാവുന്നതാണ്.
28. വാര്‍ഷിക പൊതുയോഗത്തിന്റെ അധികാരങ്ങളും ചുമതലകള്‍
സംഘടനയുടെ പ്രവർത്തന റിപ്പോർട്ട്‌, ഓഡിറ്റ് ചെയ്ത വരവ് ചെലവ് കണക്കുകൾ, വാർഷിക ബാക്കിപത്രം, ബജറ്റ് തുടങ്ങിയവ ചർച്ച ചെയ്ത് പാസാക്കുക.
ഭരണസമിതിയുടെ ശുപാർശകൾ, അപ്പീലുകൾ, ഭാവി പ്രവർത്തനത്തിനുള്ള പരിപാടികൾ, പ്രമേയങ്ങൾ തുടങ്ങി അജണ്ടയിൽ ഉൾപ്പെടുത്തിയിട്ടുള്ള മറ്റ് കാര്യങ്ങൾ എന്നിവ വാർഷിക പൊതുയോഗത്തിലോ, പ്രത്യേക പൊതുയോഗത്തിലോ ചർച്ച ചെയ്ത് തീരുമാനിക്കവുന്നതാണ്.
എല്ലാ വര്‍ഷവും വാര്‍ഷിക പൊതുയോഗത്തില്‍ വെച്ചാണ് ഭാരവാഹികളെയും ഭരണസമിതി അംഗങ്ങളെയും ഓഡിറ്റർമാരെയും തിരഞ്ഞെടുക്കുന്നത്.
29. നിയമാവലി ഭേദഗതി ചെയ്യൽ
പ്രത്യേകം വിളിച്ച് കൂട്ടുന്ന പൊതുയോഗത്തില്‍ വെച്ച് സംഘടനയുടെ നിയമാവലി ഭേദഗതി ചെയ്യാവുന്നതാണ്. നിർദ്ദിഷ്ട ഭേദഗതികൾ എന്തൊക്കെയാണെന്ന് ഒരു മാസം മുന്‍പ് സംഘടനയുടെ വെബ്സൈറ്റില് പരസ്യപ്പെടുത്തി, അംഗങ്ങളെ അറിയിച്ചിരിക്കണം. പൊതുയോഗത്തില്‍ നിലവിലുള്ള അംഗങ്ങളുടെ 2 / 3 ഭാഗത്തിന്റെ പ്രാതിനിധ്യം ഉണ്ടായിരിക്കേണ്ടതാണ്. ഹാജരായ അംഗങ്ങളുടെ 3 / 5 -ല്‍ കുറയാതെയുള്ള ഭൂരിപക്ഷം ലഭിച്ചാൽ മാത്രമേ ഭേദഗതി പാസാക്കാൻ കഴിയുകയുള്ളൂ. ഭേദഗതി പാസായാൽ 14 ദിവസത്തിനകം പ്രമേയത്തിന്റെ പകർപ്പ് ചെയര്മാന്, സെക്രട്ടറി, ഖജാൻജി എന്നിവർ സാക്ഷ്യപ്പെടുത്തി ജില്ലാ രജിസ്ട്രാർക്ക് സമർപ്പിക്കേണ്ടതാണ്.
അധ്യായം VIII - അക്കൌണ്ട്സ്
30. പ്രവര്‍ത്തന ഫണ്ട് - മൂലധനം
ഉദ്ദേശ ലക്ഷ്യ സാക്ഷാത്കാരത്തിനായി പ്രധാനമായും താഴെ പറയുന്ന മാര്‍ഗങ്ങളില്‍ സംഘടനയുടെ പ്രവര്‍ത്തന ഫണ്ട് കണ്ടെത്താവുന്നതാണ്.
1. അംഗങ്ങളില്‍ നിന്നുള്ള വരിസംഖ്യ.
2. അംഗങ്ങളില്‍ നിന്നും മറ്റുള്ളവരില്‍ നിന്നുമുള്ള സംഭാവനകളും മറ്റ് വരുമാനങ്ങളും.
3. സംഘടനയുടെ കൈവശമുള്ള വസ്തുവകകളില്‍ നിന്നുള്ള വരുമാനം
4. സംഘടനയുടെ വസ്തുവകകള്‍ കൈമാറ്റം ചെയ്യുമ്പോഴുണ്ടാകുന്ന വരുമാനം
5. സര്‍ക്കാര്‍ / സര്‍ക്കാരേതര ഏജന്‍സികളില്‍ നിന്നുള്ള ഗ്രാന്‍ഡുകള്‍.
6. വിവിധ ധനകാര്യ സ്ഥാപനങ്ങളില്‍ നിന്നുള്ള വായ്പകള്‍.
7. കമ്പനികളില്‍ നിന്നും ലഭിക്കുന്ന സി.എസ്.ആര്‍ ഫണ്ട്
8. സംഘടനയുടെ ഉദ്ദേശ ലക്ഷ്യങ്ങള്‍ നേടുന്നതിലേക്കായുള്ള പ്രവര്‍ത്തനങ്ങളോട് അനുബന്ധിച്ചുള്ള ഏതെങ്കിലും ബിസിനസില്‍ നിന്നുള്ള വരുമാനം.
9. സംഘടനയുടെ മറ്റേതെങ്കിലും പ്രവര്‍ത്തനത്തില്‍ നിന്നും ലഭിക്കുന്ന വരുമാനം.
31. സ്വത്തുക്കള്‍ - ബാധ്യതകള്‍
സംഘടനയുടെ സ്ഥാവര, ജംഗമ വസ്തുക്കളുടെ പൊതുവായ നിയന്ത്രണവും, സംരക്ഷണവും ഭരണ സമിതിയില്‍ നിക്ഷിപ്തമായിരിക്കും. സംഘടനയ്ക്ക് വേണ്ടി വാങ്ങിക്കുന്ന എല്ലാ സ്വത്തുക്കളും സംഘടനയ്ക്ക് വേണ്ടി ചെയര്‍മാന്റെയും സെക്രട്ടറിയുടെയും പേരിൽ വാങ്ങിക്കേണ്ടതുമാകുന്നു.
32. ബാങ്ക് അക്കൌണ്ട്
1. സംഘടനയുടെ പേരില്‍ ഭരണസമിതി തീരുമാനിക്കുന്ന നാഷണലൈസ്ഡ് ബാങ്കിൽ അക്കൗണ്ട്‌ തുടങ്ങേണ്ടതാണ്. ടി അക്കൌണ്ട് ചെയര്മാന്, സെക്രട്ടറി, ഖജാൻജി എന്നിവര്‍ ചേര്‍ന്ന് തുടങ്ങേണ്ടതും അക്കൌണ്ട് കൈകാര്യം ചെയ്യുന്നതിന് ചെയര്മാന്, സെക്രട്ടറി, ഖജാൻജി എന്നിവരിൽ ആരെങ്കിലും രണ്ട് പേര് ഒപ്പിടേണ്ടതുമാണ്. സംഘടനയുടെ അക്കൌണ്ടുകളില്‍ ഓണ്‍ലൈന്‍ ഇടപാടുകള്‍ നടത്താന്‍ പാടുള്ളതല്ല.
2. ഉപസമിതികളുടെ പ്രവര്‍ത്തനത്തിനാവശ്യമായ തുക നല്‍കുന്നതിനായി അതാത് ഉപസമിതികളുടെ പേരില്‍ ഭരണസമിതി തീരുമാനിക്കുന്ന നാഷണലൈസ്ഡ് ബാങ്കില്‍ അക്കൗണ്ട്‌ തുടങ്ങേണ്ടതാണ്. ടി അക്കൌണ്ട് അതാത് ഉപസമിതിയുടെ അധ്യക്ഷന്‍, സെക്രട്ടറി, ഖജാൻജി എന്നിവര്‍ ചേര്‍ന്ന് തുടങ്ങേണ്ടതും അക്കൌണ്ട് കൈകാര്യം ചെയ്യുന്നതിന് അധ്യക്ഷന്‍, സെക്രട്ടറി, ഖജാന്‍ജി എന്നിവരിൽ ആരെങ്കിലും രണ്ട് പേര് ഒപ്പിടേണ്ടതുമാണ്.
33. കണക്കുകള്‍
സംഘടനയുടെ സാമ്പത്തിക വർഷം ഏപ്രിൽ 1 മുതൽ മാർച്ച് 31 വരെയായിരിക്കും. സംഘടനയുമായി ബന്ധപ്പെട്ട വരവു-ചെലവ് കണക്കുകള്‍, ആസ്തി ബാധ്യതകള്‍ എന്നിവ സംബന്ധിച്ച ശരിയായ കണക്കുകള്‍ പുസ്തക രൂപേണയോ ഡിജിറ്റല്‍ ആയോ സൂക്ഷിക്കേണ്ടതാണ്.
34. ഓഡിറ്റ്
സംഘടനയുടെ വരവു-ചെലവ് കണക്കും ബാക്കിപത്രവും ഭരണസമിതി നിശ്ചയിക്കുന്ന ഓഡിറ്ററെ കൊണ്ട് ഓഡിറ്റ് ചെയ്യിക്കേണ്ടതാണ്. ഓഡിറ്റര്‍ ഭരണസമിതി അംഗം ആയിരിക്കാന്‍ പാടില്ല. ഏതെങ്കിലും ഒരു സാമ്പത്തിക വര്‍ഷത്തില്‍ സംഘടനയിലേക്കുള്ള ആകെ വരവ് ഒരു ലക്ഷം രൂപയില്‍ കൂടുന്ന പക്ഷം ഓഡിറ്റ് ചെയ്യാന്‍ ചാര്‍ട്ടേര്‍ഡ് അക്കൌണ്ടന്റിനെ നിയമിക്കേണ്ടതാണ്.
അധ്യായം IX - ഓഫീസ് നടപടിക്രമങ്ങള്‍
35. രജിസ്റ്ററുകള്‍ / റെക്കോര്‍ഡുകള്‍
സംഘടനയുമായി ബന്ധപ്പെട്ട് താഴെപ്പറയുന്ന രജിസ്റ്ററുകളും റെക്കോര്‍ഡുകളും സൂക്ഷിക്കേണ്ടതാണ്.
1. സംഘടനയുടെ നിയമാവലിയുടെയും രജിസ്ട്രേഷന്‍ സര്‍ട്ടിഫിക്കറ്റിന്റേയും ഫയല്‍
2. അംഗത്വ രജിസ്റ്റര്‍
3. ഭരണസമിതി യോഗങ്ങളുടെയും പൊതുയോഗങ്ങളുടെയും നോട്ടീസ്ബുക്ക്, ഹാജര്‍ ബുക്ക്, മിനിട്സ് ബുക്ക്
4. രസീത് ബുക്കുകള്‍
5. വരവ് -ചെലവ് കണക്കുകളുടെ ബുക്ക്, സ്റ്റേറ്റ്മെന്റുകള്‍
6. സ്റ്റോക്ക് രജിസ്റ്റര്‍
7. ആസ്തി ബാധ്യതകള്‍ സംബന്ധിച്ച രജിസ്റ്ററുകള്‍
8. പാസ്ബുക്കുകളും ചെക്കുകളും
9. നിക്ഷേപങ്ങളുടെ രജിസ്റ്റര്‍
10. എഴുത്തുകുത്തുകളുടെ ഫയല്‍
11. ലെറ്റര്‍പാഡ്, ലെറ്റര്‍ ഫയല്‍
12. പൊതുയോഗമോ ഭരണസമിതിയോ നിശ്ചയിക്കുന്ന ഇതര രജിസ്റ്ററുകളും റെക്കോര്‍ഡുകളും
പരമാവധി വിവരം ഡിജിറ്റല്‍ രൂപത്തില്‍ സൂക്ഷിക്കേണ്ടതാണ്
36. ഓഫീസ് നടപടിക്രമങ്ങള്‍
ഓഫീസ് നടപടിക്രമങ്ങള്‍ സംബന്ധിച്ച് വിശദമായ ചട്ടങ്ങള്‍ ഭരണസമിതിക്ക് രൂപീകരിക്കാവുന്നതാണ്.
അധ്യായം X - പലവക
37. യോഗ നടപടികള്‍ ഓണ്‍ലൈനില്‍
യോഗ നടപടികള്‍ സംബന്ധിച്ച എല്ലാ നോട്ടീസുകളും അറിയിപ്പുകളും ഇ-മെയില്‍, വാട്ട്സാപ്പ്, സംഘടനയുടെ മൊബൈല്‍ ആപ്ലിക്കേഷന്‍ തുടങ്ങിയ സംവിധാനങ്ങള്‍ ഉപയോഗിച്ച് സാധ്യമാക്കാവുന്നതാണ്. അത്യാവശ്യ ഘട്ടങ്ങളില്‍ യോഗങ്ങള്‍ ഓണ്‍ലൈനില്‍ കൂടാവുന്നതാണ്.
38. ചട്ടങ്ങള്‍ രൂപീകരിക്കാനുള്ള അവകാശം
സംഘടനയുടെ ഉദ്ദേശ്യങ്ങളുടെ നിർവ്വഹണത്തിനും കാര്യക്ഷമമായ പ്രവർത്തനങ്ങൾക്കും മറ്റും ആവശ്യമായ ചട്ടങ്ങള്‍ നിർമ്മിച്ച് നടപ്പിൽ വരുതുന്നതിന് ഭരണ സമിതിയ്ക്ക് അധികാരം ഉണ്ടായിരിക്കുന്നതാണ്. അത്തരം ചട്ടങ്ങള്‍ അടുത്ത് കൂടുന്ന പൊതുയോഗത്തിൽ വച്ച് അംഗീകാരം നേടിയിരിക്കേണ്ടതാണ്.
39. അംഗങ്ങൾക്ക് എതിരെയുള്ള സിവിൽ, ക്രിമിനൽ നടപടികൾ
1.സംഘടനയുടെ വസ്തുവകകൾ ഏതെങ്കിലും അനധികൃതമായി കൈവശം വയ്ക്കുകയോ എന്തെങ്കിലും തരത്തിൽ നശിപ്പിക്കുകയോ കേടുപാടുകൾ വരുത്തുകയോ ചെയ്താൽ അതിനുള്ള നഷ്ട പരിഹാരം ഈടാക്കുനതിനും മറ്റും അംഗങ്ങൾക്കെതിരെ നടപടി എടുക്കാവുന്നതാണ്.
2. സംഘടനയുടെ വസ്തുക്കളോ പണമോ മറ്റോ മോഷ്ടിക്കുകയോ ദുർവിനിയോഗം ചെയ്യുകയോ മന:പൂർവ്വം ദുഷ്ടലാക്കോടുകൂടി നാശമോശപ്പെടുത്തുകയോ കള്ള പ്രമാണങ്ങൾ ഉണ്ടാക്കി സംഘടനക്ക് നഷ്ടത്തിനിടയാക്കുകയോ ചെയ്താൽ മറ്റുള്ളവർക്കെന്നപോലെ അംഗങ്ങൾക്കെതിരേയും ക്രിമിനൽ നടപടികൾ കൈകൊള്ളാവുന്നതാണ്.
40. വ്യവഹാരങ്ങള്‍
വ്യവഹാരങ്ങളിൽ സംഘടനയെ പ്രതിനിധീകരിക്കുവാൻ സെക്രട്ടറിക്കാണ്‌ അധികാരം
41. മുദ്ര
സംഘടനയ്ക്ക് ഒരു മുദ്ര ഉണ്ടായിരിക്കുന്നതും അത് സംഘടനയുടെ എല്ലാ രേഖകളിലും പ്രമാണങ്ങളിലും പതിച്ചിരിക്കേണ്ടുന്നതാണ്. എല്ലാ എഴുത്തുകുത്തുകളും സംഘടനയുടെ ലെറ്റർ ഹെഡിൽ നടത്തേക്കേണ്ടതുമാണ്
42. വ്യഷമതകള്‍ നീക്കാനുള്ള അധികാരം
നിയമാവലിയില്‍ പറഞ്ഞിട്ടില്ലാത്ത ഏതെങ്കിലും സംഗതി മൂലം സംഘടനയുടെ സുഗമമായ പ്രവര്‍ത്തനത്തിന് ബുദ്ധിമുട്ടോ തടസ്സമോ ഉണ്ടാകുന്നപക്ഷം വിഷമതകള്‍ നീക്കുന്നതിലേക്കായി അനിവാര്യമായ തീരുമാനങ്ങള്‍ ഉത്തമവിശ്വാസത്തില്‍ എടുക്കാന്‍ ഭരണസമിതിയ്ക്ക് അധികാരം ഉണ്ടായിരിക്കുന്നതാണ്.
43. പിരിച്ച് വിടീല്‍
സംഘടന പിരിച്ചു വിടുകയോ, സംഘടനയുടെ പ്രവര്‍ത്തനം തുടർന്നു കൊണ്ടു പോകാൻ സാധിക്കാതെ വരികയോ ചെയ്താൽ കടബാധ്യത തീർത്ത് അവശേഷിക്കുന്ന സ്വത്തുക്കൾ പൊതുയോഗത്തിന്റെ നാലിൽ മൂന്ന് ഭൂരിപക്ഷാഭിപ്രായപ്രകാരം സമാനമായ ഉദ്ദേശ്യലക്ഷ്യങ്ങളോടു കൂടി പ്രവർത്തിക്കുന്ന സമീപത്തുള്ള ഏതെങ്കിലും രജിസ്റ്റേർഡ് സംഘത്തിലേയ്ക്കോ, സർക്കാരിലേയ്ക്കോ 1955-ലെ 12-ആം നമ്പർ ആക്ട്‌ പ്രകാരം കൊടുക്കേണ്ടതാണ്.
44. പ്രസ്താവന
1. ഈ സംഘം സമാനമായ മറ്റൊരു പേരിൽ 1955-ലെ ചാരിറ്റബിള്‍ സൊസൈറ്റി ആക്റ്റ് പ്രകാരം ഇതിന് മുന്‍പ് രജിസ്റ്റര്‍ ചെയ്തിട്ടില്ലാത്തതാണ്.
2. ഇതിന്റെ പ്രവര്‍ത്തന പരിധിയില്‍ ഇതേ പേരിലും ഇതേ ഉദ്ദേശ ലക്ഷ്യങ്ങളോട് കൂടിയും മറ്റൊരു സൊസൈറ്റി പ്രവര്‍ത്തിക്കുന്നില്ല.
3. ഈ നിയമാവലിയില്‍ എന്ത് തന്നെ പറഞ്ഞാലും (ഭേദഗതി ചെയ്യുന്നതും കൂട്ടിച്ചേര്‍ക്കുന്നതും ഉള്‍പ്പടെ) ആയത് 1955-ലെ 12-ആം നമ്പർ തിരു-കൊച്ചി ലിറ്റററി സയന്റിഫിക് & ചാരിറ്റബിൾ സൊസൈറ്റി രജിസ്ട്രേഷൻ ആക്ടിനോ അനുബന്ധമായിട്ടുള്ള ചട്ടങ്ങള്‍ക്കോ ഉത്തരവുകള്‍ക്കോ വിരുദ്ധമാകുന്ന പക്ഷം അതിന് നിയമപ്രാബല്യം ഉണ്ടായിരിക്കുന്നതല്ല.
4. ഈ നിയമാവലി 2020 സെപ്റ്റംബര്‍ 26 ആം തീയതി ചേര്‍ന്ന സൊസൈറ്റിയുടെ പൊതുയോഗത്തില്‍ വെച്ച് സര്‍വ്വസമ്മതമായി അംഗീകരിച്ച നിയമാവലിയുടെ ശരിപ്പകര്‍പ്പാണെന്ന് ട്വന്റി ട്വന്റി കോട്ടയം സൊസൈറ്റി അംഗങ്ങളായ ഞങ്ങള്‍ സാക്ഷ്യപ്പെടുത്തുന്നു.
നം പേര്, പൂര്‍ണ മേല്‍വിലാസം തൊഴില്‍ ഒപ്പ്
1 മഹേഷ്‌ വിജയന്‍
ആറ്റുവായില്‍ വീട്
എസ്.എച്ച്. മൗണ്ട് പി. ഒ
കോട്ടയം - 686006 ആക്റ്റിവിസ്റ്റ്
2 കെ. ഉബൈദത്ത്
പനച്ചിമറ്റം
പെരുംബായ്ക്കാട് പി.ഒ
കോട്ടയം . അഡ്വക്കേറ്റ്
3 സൗമ്യ മോള്‍ ടി. എസ്
തുണ്ടുതറയില്‍
കളക്ട്രേറ്റ് പി.ഒ
കോട്ടയം - 686002 സ്വകാര്യ സ്ഥാപനത്തില്‍ കോര്‍ഡിനേറ്റര്‍
4 റോബിന്‍ ജോസഫ്
ഇരുപ്പക്കാട്ട് വീട്
കാട്ടാംപാക്ക് പി. ഒ
കോട്ടയം - 686612 ഇലക്ട്രീഷ്യന്‍
5 വര്‍ഗീസ്‌ മൈക്കിൾ
ഒരപ്പാംകുഴിയിൽ
വടവാതൂര്‍പി. ഒ
കോട്ടയം - 686010 ഫിനാന്‍ഷ്യല്‍ കണ്‍സല്‍ട്ടന്റ്
6 കെ. യു. ഷാജി
കുന്നുംപുറത്ത് വീട്
കാരാപ്പുഴ പി. ഒ.
കോട്ടയം - 686003 പ്രൈവറ്റ് ലിമിറ്റഡ് കമ്പനിയില്‍ കമ്പ്യൂട്ടര്‍ ഓപ്പറേറ്റര്‍
7 ജിബു ഏലിയാസ്
ഞാറയ്ക്കല്‍വീട്
മുട്ടമ്പലം പി. ഒ.
കോട്ടയം - 686004 റിസേര്‍ച്ചര്‍
8 അഖില്‍ കെ. അപ്പുക്കുട്ടന്‍
ആദര്‍ശ് നിലയം
ചെങ്ങളം സൗത്ത് പി.ഒ
കോട്ടയം - 686022 നേഴ്സ്
9 ക്രിന്‍സ് തോമസ്‌ ജോജോ
തുറുവക്കല്‍ പുത്തന്‍പുരയില്‍
വയല പി. ഒ.
കോട്ടയം - 686587 വിദ്യാര്‍ഥി
ചെയര്മാന് സെക്രട്ടറി ഖജാന്‍ജി
പൗരൻമാരുടെ നികുതി പണം കൊള്ള അടിക്കുന്ന ഒരു ഭരണ സംവിധാനമാണ് ഇപ്പോൾ കേരളത്തിൽ ഉള്ളത് ഇതു ന് മാറ്റം വരുത്തി പൊതുജനങ്ങൾക്കു നൻമ്മ ഉണ്ടാക്കുന്ന ഒരു ഭരണ സംവിധാനം വരേണ്ടത് അത്യാവശ്യം ആണ്.
ReplyDeleteഇടതും, വലതും നമ്മളെ കബിളിപ്പിച്ചു വി ഡികൾ ആക്കിയിരിക്കുകയാണ്. ഈ പ്രവണത ഇനിയും സമ്മതിച്ചു കൊടുക്കാൻ സാധ്യമല്ല. ഉണരുക ഒരു പ്രദ്ധ കേരളം ഉയർത്തെഴുന്നേൽക്കണം.
മാറ്റങ്ങൾ അനിവാര്യമാണ്.
നമ്മൾ മാറണം,
കേരളം മാറണം
നാടിൻ്റെ അവസ്ഥ മാറ്റണം. അതിനായി പരിശ്രമിക്കുക, വിജയം നിശ്ചയം.
G. P. varikatt
ഇന്നത്തെ ഈ രാഷ്ട്രിയ അരാജകത്വം ഇല്ലാതാക്കാൻ ഇങ്ങനെ ഒരു സംഘടന രൂപീകരിക്കുന്നതിൽ സന്തോഷമുണ്ട്. എന്റെ എല്ലാവിധ പിന്തുണയും വാഗ്താനം ചെയ്യുന്നു.
ReplyDelete